Phili 4 | DOB | STEP | Gosegwao ni'atu nuwagu wa'ewena, ta yaobobomemi 'aene 'igu 'ebe gwausowala, nuwanuwagu be loguguya gete wada muliyedi, be 'ediyega wada toolopa'ala 'ida 'Inapwana manuna, be tauna ma'emiya.

Philippians 4

1 Gosegwao ni'atu nuwagu wa'ewena, ta yaobobomemi 'aene 'igu 'ebe gwausowala, nuwanuwagu be loguguya gete wada muliyedi, be 'ediyega wada toolopa'ala 'ida 'Inapwana manuna, be tauna ma'emiya.

Loguguya

2 'Omi iine Yu'odia be Sinitiki yasidasida 'emiya be wada egosigosiyana limana, 'ida 'Inapwana 'ina nuwanuwa nadigega. 3 Wate gosiya 'ai'ailigu, 'oyo toanugana, yasideyo be iine nidi 'ulemedi, manuna lowa taudi ma'egwao 'aguiguinuwa leleleya, tetela bobo'ana 'ana simana 'enaya, ta wate Kelemeniti be 'aidi wate 'agu tolemao ma'emao 'apaipaisewa, taudi 'adi esanao yawasi bukina solanaya 'eto'etoladina.

4 Tuta maibo'ana wada gwaugwausowala 'Inapwana manuna, ta wate yaeona limami 'aene wada gwausowala. 5 'Ilobwenena be tomota maibo'adi 'imi e'alama'i'ita sida mwalamwalatoni, manuna 'iabe 'Inapwana 'iila limanama.

6 Geya'abo 'ebweu to'ase manuna wanuwanuwa, ta esi ma imi lokagutoki yage maibo'adi manudi, Yaubada 'ena wada bwagobwago, be 'imi nuwanuwao manudi wada sidasida, 7 be Yaubada 'ina lemao tosinabwa sadi 'ediyega 'ida giegwausowalimi, be 'enega Yesu Keliso ma'emiya, 'atemi be 'imi nuwanuwao sida miya bobo'ana.

8 Gosegwao, gete 'ebweu wate loguguya 'aene wada nuwanuwa yage 'ai'ailidi ma 'adi 'amayaba manudi, be yage palupaludi manudi, be yage 'esasedi manudi, be yage 'adi 'ita kausala nidi manudi, be yage oboobobomidi manudi, be 'eguma to'ase bobo'ana 'ediya nai 'ebe tupu 'ediya manudi. 9 'Omi wada etotowanegu, 'igu guinuwao wa'itedi 'ediyega, be 'igu onao be 'igu e'itao wanonodiya ga wamwalatonidiya 'ediyega. 'Enega Yaubada ma ina nuwa siwalowa ma'emiya wada miya gwausowala. 5:7 Ep 6:18v7 Yo 14:27

Me Pilipai 'idi oboboma Paulo 'enaya

10 'Ida 'Inapwana nina ni'atu 'igiegwausowaligu manuna gete tuga wa'atenuwa 'ole'oleyegu wate. Ona'ai'aila, lowa nuwanuwami be walemegu ta sa'i nigeya 'ebweu wate 'eda 'imiyami. 11 Ta geya'abo sa'i yalomulomugi 'igu miya mwau lowa 'ediya, manuna ni'atu yamwalatonina ga sawesaweguya miya maibo'adi 'ediya yagwaugwausowala tuga, 12 nai miyamwau 'ediya nai 'ebe gwausowala 'ediya, nai tuta sesoi nai 'abo ma 'agu botana, nai 'eguma yaeesaesa, nai 'eguma yaetogomabeso, 13 sawesaweguya miya maibo'adi 'ediya yada gwausowala tuga, manuna tauna ma'iyagu 'amiyami ni'atu 'igiewaiwaiyegu. 14 Ta ni'atu 'igu miyamwau gete wagie kapekapeyanena 'imi lemega ga manuna yalokagutoki sinabwana 'emiya. 15 'Omi me Pilipai ni'atu wamwalamwalatoni 'aene tetela bobo'ana 'ana simana'unu 'emiya 'enaya, tuta nina Masidonia yapilisinena, ga nigeya 'ebweu 'asa 'ana toekalesiyao 'idi 'ebwayadaita 'enega silemelemegu, 'adi lema 'eguyega 'ana e'isa manuna; ta 'omi namo me Pilipai walemegu. 16 Ona'ai'aila, tuta nina lowa Tesalonaika 'ena yamiyami, 'agu lema ma'ebweuna ta muliyega 'eluwena wa'ebwa'egu. 17 'Igu ona gete nigeya 'aene nuwanuwagu 'ebwayadaita wada 'ebwa'egu, ta esi 'aene 'imi 'ebwayadaita uwana 'emiya 'ida sinabwa 'ami lema 'ai'aila manuna. 18 Ta 'imi 'ebwayadaita nina Epapilodito 'ime'ena, maibo'ana yalobena 'imaa tasitasiwa, 'atuwa nadigega 'imi taliya bobo'ana Yaubada 'enaya, ni'atu wagabuna ga maina bobo'ana Yaubada 'imuina ga manuna 'igwausowala. 19 'Enega 'igu Yaubada nina 'imi nuwanuwao maibo'adi 'ida 'ebwa'emi, nate tauna 'ina esaesa yau wawasae Yesu Keliso 'ina guinuwao 'ediyega. 20 'Enega 'ida Yaubada Tamadai nina tada tupu ataya be ataya.

21 'Igu oboboma Yesu Keliso 'ina toekalesiyao maibo'adi 'ediya. Ta gosegwao bada ma'egwao 'amiyami wate 'idi oboboma 'emiya, 22 ta toekalesiyao taudi Sisa 'ina anuwaya siguiguinuwa, be toekalesiyao maibo'adi, 'idi oboboma 'emiya.

'Inapwana Yesu Keliso 'ina obobomega yaluyaluwami sida miya bobo'ana.

'Abo'agu Paulo.

23